游船河

禮拜日跟舊同事游船河

十點上船西貢公眾碼頭上船

人多到你唔信

最後十點八先上到船

跟住往目的地出發

其實都唔知係邊個灘落腳

只知道沿途同我地同一方向航行既船係超多



成船人有約三十多人，我只係識當中2個人

當中大部份係男人

其中大部份都係吸煙的

亦有幾個人係有紋身，佔晒成個背

(以前的我會define呢班人唔惹得的)

初頭有點怕怕

慢慢熟落佢地都只不過係一大班好玩得既2x~3x既男人

佢地玩牌九，猜媒...etc唔岩我

不過睇佢地玩都幾搞笑


跟住到戲肉

到左目的地

原來係去左大蛇灣/虫禽虫勞灣!!!!!!!

我恨去個度恨左好耐了

一去到就見到有好大舊既水母，成個西瓜咁大隻

靚過水母館個d

過左陣落水玩

好清，d水跟半月灣比無咁咸

玩過下水就食飯

d野食遠超我expect既好食

有炒粉麵 (大排檔個種)

有其他basic到會既野食之餘…

仲有雞粥，係船家自已煲的

好好味

小休後玩香蕉船

好好玩

原來係要好用力的......

玩完過左陣又跟船上沙灘！

個灘好細，但d沙好幼

same as 半月

游到好出都仲係好淺水

個灘隔離d石礁有好多魚仔，有有d小魚群

好正

d魚有我手掌咁長!

唔知點解係海度游水無泳池咁吃力

玩完跟住就返歸了

成程船最後悔係落沙灘個陣唔記得帶埋部相機落去.......