睇左電車男

初初係網上面聽到電車男呢套日劇，以為佢受歡迎既原因係因為佢食住軍曹個勢，借軍曹上位，而個內容只係跟平日睇的日劇相差無幾。之前其實一直都可以從不同途徑download黎睇，只係個人對呢套劇興趣不大，直至昨日去bbq個陣，見到電視播(其實都想睇下點解受歡迎)，發覺個內容原來都唔錯，比我想象中好，所以番屋企download黎睇番。

內容唔需要多講，大概係一個秋業男點改變自已去追一個高自已幾個level既女生。

男既不修邊幅，衣著老土，只愛玩電玩睇動漫，將一個卡通女角當做女神咁，有少少隱蔽青年的感覺。現實中佢得不到滿足，事事不如意，被人看不起。

女既高貴大方，上流人士。劇中所有形容佢既都係好+ve既字眼，不過去認同佢係高貴大方等既方法就有點兒那個，亦要從西方人眼中去決定(船尾個幕，同埋睇英文書)。

成套劇被我既感覺係，日本拍呢種題材都比較大膽，因為當中佢反映出不少社會問題，而日本人本身係不願多談。例，秋業男(唔好同我講男人老狗仲咁迷戀漫畫女角都叫正常)、隱蔽青年、虐妻等…而電車上個阿叔個幕亦都見到日本人幾怕事，唔敢反抗，同時間亦表達出都市人之間的冷漠。相反，男角從虛擬世界中得到很多人的關心，跟現實係一種對比。

仲有，男跟女既身份某程度上跟我地既認知係相反的，男既無錢無地位，甚至乎連自已屋企人，同事都睇唔起；而女既就有錢有地位，得到好多人既認同，唔識既人都會認同佢。呢種設定電影同劇集中當然好常見，如果唔係點會有戲做？

成套劇仲吸引人既應該係佢食住個social culture既改變，男女地位問題，internet既興起所衍生出黎既社會問題，繼而引起好多人，亦其是個班經常流連網絡，玩電玩玩到出街都停唔到個班小眾(都唔小了)的共鳴。而我，老實說，虛還虛，實還實，internet只係一種工具，幫你個現實世界過得好d，而唔係一個matrix。